قبل ما تقرون شوفون هالفيديو ضروري
اليوم 4 - 8 ، بالعادة كان يوم 2 - 8 و قبله بايام و بعده بأيام وقت اليم و استرجاع لذكريات مفجعة ..
لكن الحين صار 2 - 8 و راح 2 - 8 و لاحد درى عنه ، يقولون هاذي سياسة دولة عشان ترجع العلاقات بينا وبين العراق ، و ما نربي نفسنا و عيالنا على الحقد عليهم و كرههم !
وحتى انا يوم إنتبهت ع التاريخ ما لقيت عندي شي اكتبه عن الغزو ، لأنه الغزو بحد ذاته مو مهم بالنسبة لي ، لكن الي صار بالكويت و الكويتيين وقت الغزو كان شي عجيب ، قمة رقي الشعب ظهرت وقت الغزو ، وعلى مرارة المحنة و صعوبة الظروف كنا نلاقي الإبتسامة تشق طريجها بين انهار الدموع الجارية !
يمكن كنت صغير وقتها لكني للحين أذكر الوناسة الي كنا نعيشها واحنا متيمعين ع الغدا ، و الوالدة الله يحفظها تقسم صحن العيش الي ما يكفي اثنين بينا كلنا و كنا ناكل و نشبع و نستانس !
والحين ، موائد و صحون تكفي مدينة لكنها من دون طعم و لا متعة !
للحين أذكر لما الوالد قعد يقسم خيشة العيش هاذا ليارنا فلان و هذا لبيت فلان و هذا لعلان ، واقوله يبا ليش تعطيهم اهو شوية ، جان يقولي : عيب يا ناصر انك تنام شبعان و تدري انه في كويتي نايم يوعان !
ما تتصورون شكثر هالكلمة اثرت بحياتي و خلتني افهم شغلات وايد و اشوف الدنيا بنظرة مختلفة ...
ماودي اقعد اترس راسكم حجي و تحلطم عن وضعنا وحالنا الحين ، لأن هالشي اشطر ناس فيه الفشلة و السلبيين ، وللأسف هذول اغلبية مجتمعنا !
لكني بقولكم شغلة وحدة بس ، لا تنطرون غزو ثاني الله يبعدنا عنه بحيله و قوته عشان يطلع الشي الزين الي فيكم ، الخير و الزين موجود فينا كلنا ، كل واحد يحمل في داخله معدن اصيل و روح تواقه للخير لكن ترسبات هالدنيا و مشاكلها غطت على هالخير الي فينا ..
عشان جذي خل تكون هالذكرى الأليمة مو وقت نسترجع فيه آلامنا وبس ، لكن خل يكون وقت ننفض فيه غبار السوء عن انفسنا الخيرة ، و نطلع أحسن مافيها حق ديرتنا و حق نفسنا
لما اسمع الأغنية الي تقول ( اذا احنا سافرنا الشوق يرجعنا .. )
أحس إنها صارت أغنية خيالية اكثر منها واقعية ، يا جماعة ما تحسون انه الكويت كان لها طعم خاص و بيدينا نفقده شوي شوي !
بدا يخف هالشعور القوي الي نحسه اول ما نطب المطار راجعين لها !
يمكن إحنا للحين نحمل في انفسنا هالحب الكبير الي تربينا عليه لديرتنا ..
لكن يا خوفي على الي عقبنا انهم ما يتربون ع الحب الي تربينا عليه و تكون لهم الكويت مجرد بنك يعطيهم الفلوس عشان ينحاشون منه لبرة !
خل تكون ذكرى الغزو .. وقفة للكويت
خل تكون نقطة حساب .. نحاسب فيها نفسنا و نتعذر فيها للكويت
خل تكون لحظة وفا .. نجدد العهد و نرد نقول نحبج يالكويت
بس مادري شقول مادري شألف ، والله إنج أكبر من كلامي يالحبيبة
-
-
-
