وايد ناس تعتبر ايام العيد الوطني و عيد التحرير من أحلى ايام السنة و ينطرونها نطرة عشان يستانسون فيها و يفرفشون !
و ع طبيعتي انا عكس الناس كل ما ياو اليومين يضيق خلقي و اصير مهموم ، بتقولون لي ليش ؟ وين وطنيتك ؟ وين حبك للكويت ؟
راح اقولكم ببساطة إذا حبي للكويت راح يكون بقوطي فووم و ستكر و بالون ماي ! فبلاه هالحب و بلاه هالوطن الي نعبر عن حبه بتحذف بيض !
وقت الإحتفالات اكون بالشاليه و اقعد بالبلكونة أطمش على هالأوادم وشسوون و شالخبال الي عايشينه !
و اقعد افكر ليش كل هالخبة و هالسوالف الي ما تصير بأي يوم ثاني بالسنة الا بهاليومين ؟
الجواب المنطقي انه هاليومين أهم العيد الوطني و عيد التحرير !
ضحكت على نفسي و على كل الي بالمسيرة و قعدت أقول ليش نحتفل بهاليومين ؟
طبعا الجواب لأن بالعيد الوطني إستقلت الكويت و صرنا دولة ! و بعيد التحرير تحررنا من الغزو و ردينا صرنا دولة حرة مرة ثانية ؟
فجأة صدمتني الحقيقة المرة !
وهي بأن 99.9 % من حضور المسيرة مو فاهم شنو يعني عيد وطني و لا عيد تحرير ، شنو يعني إنه يكون لك سيادة مستقلة و تكون لنا دولة مستقلة و ما نتبع أي دولة !
مو فاهمين شنو كان الغزو و جم طول الغزو ولا يعرفون جم شهيد ولا جم أسير راح بالمحنة ولا ليش غزونا ولا حتى التضحيات الي قدموها أهل الكويت عشان يتحررون !
ما أتوقع يفهمون شنو يعني دولة حرة ذات سيادة مستقلة و شلون أجدادنا و آبائنا ضحوا بالغالي والنفيس عشان تظل الكويت دولة حرة ذات سيادة !
اليوم يحتفلون بالعيدين و يلبسون أعلام الكويت و يشيلون الوانها ، وباجر يبيعون جناسيهم بالإنتخابات ولا يصوتون لفاسد معلوم الفساد بس لأنه من الأهل أو من الربع !
اليوم يحتفلون بالعيدين و باجر يفلون من الدراسة و يدورون واسطة يبون وظايف فيها مستقبل ؟
والله تمنيت لو يلغون الإحتفالات بهاليومين لأنها ببساطة إهانة لكل من ضحى بسبيل الإستقلال و لكل من عانى و إستشهد لتحرير الكويت
فعلا بأي حال عدت يا عيد ؟
عدت لنا بالفتن الطائفية و الي يشعلون هالفتن ويتنفعون منها !
عدت لنا بزمن بلطجية التجار و سياسية وسع لي و أوسع لك !
عدت لنا بحكومة الصفقات و المقايضات و المبادلات !
عدت لنا بجيل ما فهمك يا عيد ؟ وما عرف الغاية من ورائك !
شتان بين من كان يبكي حبا و فخرا عند سماع شادي الخليح و سناء الخراز يغنون للكويت !
وبين من يهز وسطه و يرش ( فومه ) عند سماعهما !
والله شي يضيق الخلق ..
انا إتخذت قرار اني إبتداءا من السنة الياية ماراح اقعد بالديرة في أسبوع عيدي الإستقلال و التحرير و ابعد عن كل هالمصخرة عشان ما اعور قلبي ..
و أحتفل فيهم ولو كنت بعيد !
بعيد عن ديرتي بجسمي لكنها دايما معاي بقلبي !
فديتج يا كويت :"(
