قبل فترة زرت بلوق العزيزة خروفة ، وقريت لها بوست عن أمنياتها لسنة 2007 و الي تحقق منها و أمنياتها اليديدة لسنة 2008 !
و فكرت و سرحت شوي انا ونفسي :)
ولقيت إنه عندي أمنيات كثيرة بحياتي ، يمكن مو محددها بسنوات لاني ماحب أحكر نفسي بشي لكن عندي شغلات وايد أحس إني لازم أسويها شغلات مرتبطة ببعض القيم عندي و شغلات أحس إنها راح تخلي حياتي أحسن وشغلات أحبها !
عشان جذي راح أحط لكم لستة بالشغلات الي لازم أسويها بحياتي و ليش ..
1- ابي أتزوج ..
مابيها ملكة جمال ، مابيها متميزة وايد أبيها تحقق لي أحلامي بس !
عشت حياتي و مريت بتجارب وايد و دشيت بعلاقات و تعرفت على بنات ، لكن بالرغم من كل هالتجارب كنت دايما أحس إني ماراح ألاقي الحب الحقيقي إلا إذا تزوجت ، وكنت إذا شفت فلم ما أتأثر بمنظر واحد مع ( حبيبته ) كثر ما أتأثر بمنظر واحد مع زوجته حتى لو كان المنظر أقل رومانسية !
عندنا هني سهل إنك تلاقي وحدة حلوة و خلوقة و تتزوجها ، لكن الصعب إنك تلاقي وحدة ممكن إنها تعيش معاك الحياة مثل كنت تحلم و الأصعب إنك تخليها تحبك و تعيش معاها برومانسية !
هالشغلات تخليني دايما أحاتي منو راح اتزوج و شلون ألاقي البنت المناسبة !
2- أبي تصير عندي بنت !
بالطبع بعد ما أتزوج ودي أول مولود لي يكون بنت ، ودي أعيش الشعور لمن مرتي تقولي ( أنا حامل ) و اعيش الـ 9 شهور معاها ، و أتحمل ( مزاجها ) الي كل شوي يقلب p; !
أنطرها برة غرفة الولادة و أنا أحاتيها !
و اهم من كل هذا ودي أعيش الشعور إذا طلعولي بنتي و شلتها بإيدي و بستها !
3- أبي أنقذ حياة إنسان ..
كنت دايما معجب بالمسلسلات الطبية مثل ER و Gray's anotomy كنت وايد معجب بشعورهم إذا نجح واحد فيهم و أنقذ حياة إنسان ، أبي أحس بهالشعور ، و أشوف إنه الي سويته زاد بقيمة هالحياة الي اعيشها .
4- أبي أنقز إباراشوت من أعلى إرتقاع ممكن :) !
لا زم أسوي هالشي ، و مخطط أسوي عن قريب بس أخاف أدمن على الشغلة و أقعد أناقز من كل مكان :)
5- اتعلم إيطالي !
وايد أحب هاللغة و أستمتع و انا أسمعها ، عندي جم فلم إيطالي أشغلهم بدون ترجمة و أقعد أستمتع بالكلمات :)
6- احضر مبارة لريال مدريد بنهائي دوري الأبطال ..
أحب هالفريق و حضرت له مباريات من قبل لكن مبارة النهائي غير :)
7- أصير مدير شركة :
مو بس أصير مدير أبي أحقق شي كبير فيها و تصير من كبرى الشركات بالعالم مو بس بالكويت :)
8- اعيش بنيويورك :
مادري شكثر بس مو أقل من شهر ، هالمدينة لها سحر خاص و مع إني سافرت لها لكن ما تقدر تحس بهالسحر كسايح لازم تعيش فيها عشان تحس فيه !
9 و 10 شغلات مهمة بعد لكنها خاصة ودي أحتفظ فيها لنفسي :)
أتمنى أحقق هالشغلات بحياتي لاني أحس إنها صج راح تضيف لها شغلات وايد تخليها أحسن !
C ya all
&
take care
