إخوانا الإنقليز يقولون
Ignorance is a bless
ما قدرت قيمة هالمثل إلا بالفترة الي طافت !
فعلا الإنسان الجاهل قد يكون فاشلا في حياته او الناس ما تحترمه لكنه بالنهاية غير واعي لفشله و يصنع لنفسه حاله من السعادة على اي موضوع بالكويتي ( عايش جوه ) مهما الناس انتقدوه و ضحكوا عليه !
لكن بالنهاية الإنسان الواعي مشكلته إنه واعي و الوعي هذا يسوي له مشاكل وايد فهو اساسا راح يوعى حق كل مشكلة تواجه او يعاني منها و يتضايق و ينشغل باله عشان يحلها و أصعب شي إذا كان حلها مو بيده أو صعبه فراح يعيش بتعب و هم لين يحلها و ينتهي منها ! تخيلو معاي لو إنه مو حاس بهالمشاكل فراح يعيش ملك زمانه و مستانس بحياته !!أدري يمكن تكون هالنظرة ( متطرفة ) حيل لكن فكرو فيها !
بالنهاية أنا مو جاحد لنعمة الوعي فلو قسناها بالعقل إنسان واعي تعبان أحسن من إنسان جاهل مستناس .. لكن ما تتعتقدون هالموضوع يستحق التفكير ؟
يمكن تستغربون من العنوان ( تباريح ) لكني حسيت إنها كلمة معبرة بصراحة يعني الواحد لمن يقول ( آلام ) أو ( بوح ) غير لمن يقول ( تباريح ) كلمة تعبر عن الألم و الوحدة و شغلات وايد أحس فيها ..
الي يعرفوني يدرون إني وايد أكتب فانا وايد أحب خواطر ومرات شعر و ما أكتب لأني شاعر او أديب او كاتب لكن هالخواطر إهي المنقذ بالنسبة لي كلما حسيت بشي أو فكرت بشي فلمن أكتب مشاعري و أفكاري أحس بشعور حلو فالتعبير عن هذه الامور يحقق رضى داخلي للشخص إذا قراها و الناس شاركوه فيها و حسو فيها ..
لكن بالفترة الأخيرة ما قدرت أكتب شي و السبب اني فقدت الكثير من المشاعر الي كنت أحس فيها و صرت بعيد عن التفكير بهالأمور لأني إكتشتف إنها حيل اتعب و تعور القلب و توقعت إني برتاح إذا بعدت عنها لكني إكتشفت إنه الكتابة اهي أكثر شي يريحني خصوصا إني ماحب أشكي و أفضفض حق أي أحد !المشاعر و الكتابة داء و دواء و لو ماكانت دوا كامل لكنها تحسسك إنه في أحد برة يسمعك و يحس فيك حتى لو ما يعرفك و هذي أقوى رغبات الإنسان وهي التواصل ..
فإكتشفت إني ما عمري فقدت المشاعر و الإحساس فهذا شي الإنسان ما يقدر يفقده لكنا نقدر نحاربها و نخشها وللأسف هذا الشي الي كنت قاعد أحاول أسويه و الحمدلله إني ما نجحت فكانت أقوى مني ،فالي يعيش بعيدا عن مشاعره و أحاسيسه يعيش بعيد عن نفسه و عن كل شي حلو بحياته ..
يعجبوني الناس الي ما يخافون من مشاعرهم و ما يستحون منها و يعبرون عنها بكل أريحية و شجاعة ، فهم ناس يعيشون حياة سوية و ممتعة يتواصلون فيها مع نفسهم قبل ما يتواصلون مع الناس و مع الي يحبونه ..
الحب مو عيب ! و التعبير عن هذا الحب مو غلط بعد !
الممارسات الغلط الي ارتبطت للأسف بالحب بهالوقت اهي الغلط و اهي الي لازم نحاربها لنتواصل و لنُعَيِر عن انفسنا و مشاعرنا !
فلا حياة دون تواصل وتعبير
مع محبتي،،
ناصر
